انتشر يوم امس تسجيل جديد ولكنه يتعلق هذه المرة بتلقي احد المحققين عرضا بنصف مليون دينار مقابل اغلاقه قضية رفعها ضد احدى الشركات وفقا للمكالمة الهاتفية التي اكد المحقق مصعب الفيلكاوي انها تخصه فعلا وانها حقيقية، لكن لم يصدر أي بيان أو نفي أو رد فعل من الشركة حول هذا الأمر.
وفي المكالمة الهاتفية يتلقى المحقق الفيلكاوي عرضا من احد الاشخاص قدم نفسه كوسيط بين المحقق ومسؤول بالشركة لاغلاق ملف القضية مقابل الحصول على مبلغ مليون دينار نصفه للمحقق والنصف الاخر للمتصل الذي قدم نفسه وسطيا، مؤكدا ان أحدا لم يكلفه بهذه الوساطة الا انه يستطيع الدخول كوسيط لانهاء القضية بهذا الشكل.
وفي المكالمة يوضح بدوره المحقق مصعب الفيلكاوي انه سبق وتلقى عروضا مالية بلغت 130 الف دينار الا انه رفضها ثم يوضح بعدما رفض عرض النصف مليون انه حرك عددا من الدعاوى القضائية ضد الشركة، مشيرا الى انه في شكوى تقدم بها الى سمو رئيس للوزراء ولم يدكر اسم الشخص المعني بالشركة وانما قاضى الشركة كمتعهد.
وبعد تسريب هذا المقطع الصوتي الذي تناقلته وسائل التواصل الاجتماعي امس الاول انتشر فجر امس على ذات الوسائل كتاب رسمي وقف المحقق الفيلكاوي عن العمل بسبب توجيه اتهامات اليه في قضية متداولة في القضاء.
وخلال نفس المكالمة وردت أسماء مسؤولين على لسان من عرض نفسه وسيطا مع المحقق يدلل بها له على انه لن يستطيع ان يصل الى نتيجة في حال استمراره بالقضية فيما ان اغلاقه ملفها سيعود عليه بفائدة مالية وفيما يلي نص المكالمة:
مصعب: قولي قولي حبيبي.
المتصل: شوف عمو حبيبي.
المتصل: الحين انتو رافعين عليه قضية.. صح؟.
مصعب: انا رافع عليه.
المتصل: انت بروحك رافع عليه والباجي الـ80.
مصعب: اهو اسمعني.. يوم رفعنه القضية.. احنا رفعنه شكوى حق رئيس مجلس الوزراء.
مصعب: قلنه.. علما بأن الشركة المتعهدة.. ما قلنه اسمه احنا.
المتصل: اي.
مصعب: بس احنا ماقلنه اسمه، ولا قلنه، ولاقلنه شي نهائيا.
المتصل: انزين شرايك انته ترجع مكانك، دوامك.
المتصل: انته بالجهراء الحين صح؟.
مصعب: بالجهره اي.
المتصل: اقولك شي.. ترجع دوامك حجي.
مصعب: اي.
المتصل: مكانك بحولي، معزز مكرم.
و100 الف دينار بجيبك، شرايك؟.
مصعب: لا ما بي، اعرضوا علي 130 الف الله يهداك.. ياي تقولي 100 الف، ولا ابي منه اي شي اساسا.
المتصل: 200 الف..
مصعب: ولا 200 الف.
المتصل: 300 الف، نص مليون، بس اكثر من جذي ما اقدر.
مصعب والله مابي لا..مابي منه ولا فلس.
المتصل: اسمع انته ما راح تروحله.
المتصل: انت اسمع.. خلني استفيد وياك انا.
المتصل: انا راح ايي اقوله.. يبه تبي اسكر الموضوع.. حطلي مليون وانا اسكر الموضوع كله. وشرط تردون مصعب مكانه.
مصعب: ممكن اقولك شي بس على اساس اتعرف بس، على فكره شفت القضية هذي.
المتصل: اي.
مصعب: هذي قضية وحدة.. انزين.
مصعب: انا رافع عليه 7 قضايا.
المتصل: انزين خلنه نسكرها بنص مليون.. مصعب فلوس بناخذ فلوس.
مصعب: مابي فلوس مابي فلوس، اسمعني..هذا الله يسلمك في ثلاث قضايا من الثمانية هذيلا، في امن الدولة.. رفعتهم في امن الدولة.
المتصل: بالنظرة راح يطلع منها تدري ليش..انا اقولك ليش، تدري منو وياه مصيعب.
مصعب: منو؟.
المتصل: انت قاعد تتكلم وياه اهوا ضد رئيس الوزراء.
المتصل: ف انسى الموضوع اهما اكبر، اكبر شي راح يسوون وياك الحين يردونك دوامك واشياء بسيطة راح تاخذها.
المتصل: فأنا اقولك اهي قضية دسمة.
المتصل: انته بترفع عليه قضية بتربحه ماراح تقدر انا اقولك.
المتصل: انا اخوك واقولك اياها ترى ما ادافع عنه (……) اهو انا بستفيد وياك.
المتصل: انطقه بمليون، نص لك ونص لي..وترجع دوامك تستفيد، تعيش انت وعيالك احسن لك.
المتصل: احسن ماترفع قضية وتجاهد على ولا شي..ماراح يصير ولا شي، بيسجنونه؟.
المتصل: انسى ينسجن.
المتصل: يبي يصير حديث عام مثل الميموني بعدين ينام الموضوع.
المتصل: ف انته دام بحرارته شتبي (…..) ماراح تحصل شي اخذها من اخوك.
المتصل: انا ابي لك نص مليون.
المتصل: انا ترى مو قاعد اقولك اهو عارض على (…..) للحين ما كلمته.
المتصل: تعطيني الجرين لايت انا اكلمه.
مصعب: لا احمد مابي مشكور، لا مابي ادش معاه بفلوس ولا شي.
مصعب: اقول له اعرضوا على المباحث.
المتصل: انا ماراح اقوله.. ماراح اقوله مصعب، انت شفيك، افهم ماراح اييي اقوله مصعب.
المتصل: اقوله شفت حل قضيتك هذي كلها عندي انا.
المتصل: حط مليون دينار وعليكم السلام مع السلامه، انا اسكر لك، انيم لك الموضوع كله.
المتصل: شتبي انته اكثر من جذي عارضين عليك 130 الفاً، انا اييبلك نص مليون ياغبي.
المتصل: فكر فيها لا تعطيني وانت صاعد ولا تستشير احد ولا تقول حق احد.
المتصل: فكر فيها وسكر لان انته مصعب قاعد ادز فوضى، انت قاعد ادز فوضى.
المتصل: هذا ريال لورد، هذا من تجار البلد، هذا ابوه لو يشيل فلوسه من الكويت.
المتصل: تدري جم موظف كويتي عنده.
المتصل: ماراح يشوفونك انته مصعب مع احترامي الشديد لك انت ياخوي (……).
المتصل: انا وياك مو وياه، اهي الضربه جذي راح تصير.
المتصل: غير جذيه انت خسران وراح اذكرك فيها بيوم من الايام.
المتصل: فكر فيها لاتعطي قرار صعب لاتعطي قرار الحين.
المتصل: والله نص مليون وترجع دوامك انت بخير وانته بسلام وانته بامان.
المتصل: هذي نص مليون تسكر ديونك تضبط مسائلك، وتبني لك بيت بعد.
مصعب: احاجيك.
المتصل: فكر عدل.
المتصل: فكر عدل مصيعب والله فيها رزق.
مصعب: فكرت وايد، اعرضوا علي مابي.
مصعب: اعرضوا علي اكثر..مابي مابي
المتصل: كيفك.
مصعب: يعني اهو.. احاجيك القضية لان واصله امن الدولة.
مصعب: اهوا الحين تدري على فكرة، تدري.. شكثر كلموني ان يالله تنازل تنازل تنازل.
المتصل: اي اي..اهما يكلمونك عادي بس مصعب بقولك شغله راح يلعبون لعبه.. انته لا تنسى وياه (لا)، وياه ولد رئيس الوزراء.
المتصل: يعني ماراح يطالعكم.. (ب ك) وياه.
المتصل: يعني لما يكون (ب.ك) وياهم.. يعني بشار الاسد وياهم.
المتصل: مصعب بيخربون.. يعني هل انته تعتقد ان القانون يبي يوقف بصفك ضد هالقانون.
المتصل: هذيلا قانون.. انا قاعد اشوف توا ذاكر ضباط كبار(….) مو مخلي احد مو دازه.
اترك تعليقاً